ភ្នំពេញ៖ យោងតាមលិខិតដែលគេហទំព័រ E-Arts ទទួលបាននៅថ្ងៃទី២០ ខែឧសភា ម្សិលមិញនេះ មានការជូនដំណឹងពីសំណាក់ លោក យិន គន្ធ ប្រធានមណ្ឌលអប់រំកែប្រែទី១ (ម-១) ឬពន្ធនាគារព្រៃ-ស មកកាន់ប្រធានសាលាឧទ្ធរណ៍រាជធានីភ្នំពេញ ស្តីពីការផ្អាកដឹកជញ្ជូនជនជាប់ឃុំមកជំនុំជំរះមួយរយៈ បន្ទាប់ពីរកឃើញមានករណីឆ្លងកូវីដ-១៩ ក្នុងពន្ធនាគារ។

ក្នុងលិខិតនោះបានបញ្ជាក់ថា៖ <នៅមណ្ឌលអប់រំកែប្រែទី១ មានជនជាប់ឃុំចំនូន ១៨នាក់ មានវិជ្ជមានជំងឺកូវីដ-១៩ បច្ចុប្បន្នមណ្ឌលកំពុងអនុវត្តវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងព្រឹត្តិការណ៍សហគមន៍ ២០កុម្ភៈ និងកំពុងស្រាវជ្រាវរកអ្នកពាក់ព័ន្ធដោយផ្ទាល់ និងប្រយោលយកសំណាកធ្វើតេស្តរកជំងឺកូវីដ-១៩>។​ ជាងនេះទៅទៀត បើតាមប្រភពពី លោក នុត សាវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ ថ្លែងប្រាប់សារព័ត៌មានក្នុងស្រុកមួយ ក៏មាននូវករណីរកឃើញអ្នកវិជ្ជមានកូវីដ-១៩ ក្នុងពន្ធនាគារខេត្តព្រះសីហនុផងដែរ។

គួរបញ្ជាក់ថា ករណីនេះក៏កំពុងតែរាតត្បាតនៅក្នុងប្រទេសថៃផងដែរ ពោលគឺគិតត្រឹមថ្ងៃទី២០ ខែឧសភានេះ ថៃបានប្រកាសពីការរកឃើញអ្នកជាប់ឃុំចំនួន ១១,៧៦០នាក់ នៅក្នុងពន្ធនាគារចំនួន១៣ មានវិជ្ជមានកូវីដ-១៩។ នេះបើយោងតាមការឱ្យដឹងពីអគ្គនាយកដ្ឋានអប់រំកែប្រែរបស់ថៃ៕